ରଘୁନାଥଙ୍କ ଜଣାଣ ( ୰ ଶ୍ରୀମତୀ ସୁଶୀଳା ଦେବୀ ଗଦା ସାହି, ଆଠଗଡ, କଟକ)

 

            

🙏 "ରଘୁନାଥଙ୍କ ଜଣାଣ "🙏

କର ଯୋଡି ନିବେଦନ

କରୁଛି ଜଣାଣ ବସି ଅଧମ,  କୃପାମୟ ହେ ;

କର କଷ୍ଟ ନିବାରଣ, କୃପାମୟ ହେ l

ଖଣ୍ଡନ କର ମୋ ଦୁଃଖ

ଖଟି ପଦେ କହେ ହେ ପଦ୍ମ ମୁଖ, ଖିରାଶାୟୀ ହେ ;

ଖିଆଲି ନ ମଣି ଦେଖ, ଖିରାଶାୟୀ ହେ l

ଗରିବ ଗଞ୍ଜନ ବାନା

ଗରିବ ଗୁହାରି କର୍ଣ୍ଣେ ଶୁଣନା, ଗଦା ଧର ହେ ;

ଗରିବ ଡାକୁଛି ସିନା, ଗଦାଧର ହେ l

ଘନ ବରଜ ମୂରତି

ଘଡ଼ିଏ ଚାହିଁଲେ ଯିବ ଦୁର୍ଗତି;ଘନଶ୍ୟାମ ହେ ;

ଘାଣ୍ଟି ହୁଏ ଦିନ ରାତି, ଘନ ଶ୍ୟାମ ହେ l

ଉପାୟ ନାହିଁ ମୋହର

ଉଦ୍ଧାର କରନ୍ତୁ କମଳା ବର, ଆର୍ତ୍ତ ତ୍ରାଣ ହେ ;

ଉଚିତ ବିଚାର କର, ଆର୍ତ୍ତ ତ୍ରାଣ ହେ l

ଚତୃବର୍ଗ ଫଳ ଦାତା

ଚାହିଁ କୃପା ନେତ୍ର ଜଗତ ପିତା, ଚକ୍ରଧର ହେ ;

ଚାଲି ଯାଉ ମୋର ଚିନ୍ତା, ଚକ୍ରଧର ହେ l

ଛାଡି ଅଛି ସବୁ ଆଶା

ଛନ୍ଦା ଚରଣ କୁ କରି ଭରଷା, ଛଦ୍ମ ବେଶି ହେ;

ଛଟକେ ଯାଉ ଦୁର୍ଦଶା , ଛଦ୍ମ ବେଶିହେ l

ଜଳ ରୁ ଗଜ ଉଦ୍ଧାରି

ଜଗତେ କୀର୍ତ୍ତି ରଖିଲ ମୁରାରୀ ;ଜଗନ୍ନାଥ ହେ

ଜିବା ଜିବେ ଅଛ ପୁରୀ, ଜଗନ୍ନାଥ ହେ l

ଝୁରି ହୁଏ ନିଶି ଦିନ

ଝଟକେ ଏ ହରି ଦିଅ ଦର୍ଶନ, ଛିନ୍ନ ବାସ ହେ ;

ଝାଉଁଳି ଯାଏ ପରାଣ, ଛିନ୍ନ ବାସ ହେ l

ଟାଣ ଭାଙ୍ଗି ଯାଏ ମୋର

ଟାପରା କରନ୍ତି ଜଗତେ ନର, ଟଙ୍କ ଧର ହେ ;

ଟଳେ ପରାଣ ମୋହର, ଟଙ୍କଧର ହେ l

ଠକୁଛ କାହିଁକି ମୋତେ

ଠାବ ଦିଅ ପଦ୍ମ ପଦେ ନିରତେ, ଠଣା ମୁଖ ହେ ;

ଠିକେ ଜଣାଇବି ତୋତେ, ଠଣା ମୁଖ ହେ l

ଢମ ମୋର କିଛି ନାହିଁ

ଢଳ ଢଳ ଭଙ୍ଗୀ ଦେବ କହେଁଇ, ଢଳିପଡ଼େ ହେ ;

ଢାଳି ରଖ ଦୟାବହି, ଢଳି ପଡେ ହେ l

ଅଣା କର ତୁମେ ହରି

ଅଣ ଆୟତ୍ତ ରେ କରେ ଗୁହାରି, ଆନ୍ତର୍ଯମୀ ହେ ;

ନ ଶୁଣ ଦୁଃଖ ମୋହରି, ଅନ୍ତର୍ଯମୀ ହେ l

ତରିଛି ବନେ ମୃଗୁଣୀ

ତାରିବ ମୋ ଦୁଃଖ ହେ ଚକ୍ର ପାଣି,ତ୍ରିଲୋକେଶ  ହେ

ତରିଅଛ କେତେ ପ୍ରାଣୀ,ତ୍ରିଲୋକେଶ ହେ l

ଥୟ ନୁହେଁ ପଞ୍ଚ ପ୍ରାଣ

ଥରେ ମାତ୍ର ପ୍ରଭୁ ହଉ ପ୍ରଶନ୍ନ, ସ୍ଥୁଳଭୁଜ ହେ ;

ଥରେ ମୋ ବିନୟ ଘେନ, ସ୍ତୁଲଭୁଜ ହେ l

ଦୀନବନ୍ଧୁ ନାମ ବହି

ଦରିଦ୍ରେ ସୁଦୟା ନୁହଁ କିମ୍ପାଇ, ଦୟାମୟ ହେ ;

ଦିନହୀନ ଆରତେ ଡାକଇ, ଦୟାମୟ ହେ l

ଧ୍ରୁବ କୁ ଉଦ୍ଧାର କରି

ଧରା ଧାମେ ଖ୍ୟାତି ନାମ ତୁମରି, ଧନୁର୍ଧାରୀ ହେ ;

ଧନ୍ୟ ମହିମା ତୁମ୍ଭରୀ l

ନରସିଂହ ରୂପ ଧରି

ନଖାଗ୍ରେ ହୀରାଂଣ୍ୟ ଅଛ ଉଦ୍ଧାରି, ନଟବର ହେ ;

ନୀଳାଞ୍ଚଳେ ବିଜେ କରି, ନଟବର ହେ l

ପଥର ହୋଇ ଅହଲ୍ୟା

ପଡିଥିଲା ପରା ଦୁଖେ ଅବଳା, ପଦ୍ମ ନାଭ ହେ ;

ପାଦ ବାଜି ମୁକ୍ତି ଲଭିଲା, ପଦ୍ମନାଭ ହେ l

ଫଟା ଭାଗ୍ୟ କୁ ମୋହର

ଫିଟୁନାହିଁ ପ୍ରଭୁ କୃପା ଭଣ୍ଡାର, ଫାଣୀଧର ହେ ;

ଫନ୍ଦି ମୋ ପାଇଁ ନ କର, ଫଣୀ ଧର ହେ l

ଭକ୍ତ ଉଦ୍ଧାରଣ ହରି 

ଭଵ ଜଳଧି ରୁ କରନ୍ତୁ ପାରି, ଭଗବାନ ହେ ;

ଭିକ୍ଷା ଏ ସଦା ମୋହରି, ଭଗବାନ ହେ l

ମାୟା ନକର ମୋ ଠାରେ

ମହିମା ତୁମରି କେ ବର୍ଣ୍ଣି ପରେ, ମହାବାହୁ ହେ ;

ମାୟା ମୋହେ ପଡି ଡରେ, ମହାବାହୁ ହେ l

ଯାମାଳାଅର୍ଜୁନ ଭଞ୍ଜନ

ଯମୁନା ତଟରେ କର ଭ୍ରମଣ, ଯାଦୁନାଥ ହେ ;

ଯାଉଛି ଜୀବନ ଘେନ, ଯାଦୁନାଥ ହେ l

ରଖିଲ ପ୍ରହଲ୍ଲାଦ ବୀର

ରାମକୃଷ୍ଣ ହରି କୋଦଣ୍ଡ ଧର, ରଘୁନାଥ ହେ ;

ରଙ୍ଗେ ଧରିଲ ମନ୍ଦର, ରଘୁନାଥ ହେ l

ଲୟ ମୋ ନାହିଁ କାହିଁ ରେ

ଲୟ ରଖି ଅଛି ତୁମ୍ଭ ପୟରେ, ଲକ୍ଷ୍ମୀ ଧର ହେ;

ଲଗାଅ ନାବ ମୋ କୂଳେ, ଲକ୍ଷ୍ମୀ ଧର ହେ l

ବଳବନ୍ତ ପ୍ରଭୁ ବୋଲି

ବଳ ଅବଳ କୁ ମୂଁ ଆଶ୍ରା କାଲି, ବଂଶୀଧର ହେ ;

ବନେ ମୂଁ ପାଉଁଶ ହେଲି, ବଂଶୀ ଧର ହେ l

ଶରଣ ବତ୍ସଳ ନାଥ

ଶରଣ ଧାରୀ ମୂଁ କହେ ଶ୍ରୀ ନାଥ, ଶ୍ରୀଧର ହେ ;

ଶଙ୍କିତ ସଦା ମୋ ଚିତ୍ତ, ଶ୍ରୀଧର ହେ l

ସଦାନନ୍ଦ ପଦେ ଯାର,

ସଭିଏଁ ଖଟନ୍ତି ହୋଇ କିଙ୍କର, ଶ୍ରୀ କାନ୍ତ ହେ;

ସେ ପଦେ ଆଶା ମୋହର, ଶ୍ରୀ କାନ୍ତ ହେ l

ଷ ଠ ପାଦ ବନ୍ଧୁ ପଦେ

ଷ ଠ ଦୁଇ ପାଦ ଗରିବ ବନ୍ଦେ, ଷ ଠ ତ୍ରୟ ହେ ;

ସରଣା ଗତ ରହୁ ହୃଦେ,ଷ ଠ, ତ୍ରୟ ହେ l

ହରି ହର ନାଥ ମୋର

ହରି ଦୟା ମୟ ଶ୍ୟାମ ସୁନ୍ଦର, ହୃଷିକେଶ ହେ ;

ହରଷେ ସୁଦୟା କର, ହୃଷିକେଶ ହେ l

କ୍ଷମା ମାଗୁଛି ପୟରେ

କ୍ଷମା ଅପରାଧୀ "ଶଶୀ " ଅକ୍ଷରେ, କ୍ଷମାନିଧି ହେ ;

ଖୁଦ୍ର କଥା ଶୁଣି ଡରେ, କ୍ଷମା ନିଧି ହେ l

"କ" ଠୂ "କ୍ଷ"  ଅକ୍ଷରେ

ଲେଖିପକାଇଛି, କ୍ଷୀଣ ଶରୀରେ, କ୍ଷମା ମୟ ହେ ;

କ୍ଷଣେ ଚାହଁ ରଙ୍ଗା ଅଧରେ, କ୍ଷମା ମୟ ହେ l🙏

୰ ଶ୍ରୀମତୀ ସୁଶୀଳା  ଦେବୀ

ଗଦା ସାହି, ଆଠଗଡ, କଟକ